Det er frivilligsentralane som inviterer til det årlege frivilligforumet i kommunen som er ein samhandlingsarena for frivillig i Fjord kommune.

Ordførar Eva Hove tok fram at dugnad, der vi stiller opp for andre, er ein særnorsk tradisjon gjennom over tusen år. Vi har velferdstenester som vart sett i gang av organisasjonar og seinare overteke av det offentlege. Eit døme er helselaget i Stordal som tilsette og løna ein sjukepleiar i mange år.

Omgjort i pengar utgjer verdien av frivillig innsats kr 78 milliardar i landet vårt som tilsvarar 142.000 årsverk. I ei undersøking om frivilligheit i 2020 kom det fram at 55 % av alle i Noreg sa dei har utført frivillig arbeid. Omlag halvparten er knytta til idretten. For å sikre rekrutteringa, er det viktig å trekkje ungdommen med i frivillig arbeid slik at dei opplever verdien av det.

Elles tok ho m.a. fram Stortingsmeldinga “Leve heile livet” og at samspelet mellom det offentlege og dei frivillige er viktig for å oppretthalde det gode samfunnet. Dei sosiale møteplassane er viktige for at vi skal ha det godt. Å gjere noko for andre er også meiningsfylt, ein kjenner seg nyttig når ein opplever at folk møter opp på arrangementa og har det kjekt i lag.

Anna Lianes, rådgjevar Møre og Romsdal fylkeskommune, nemnde m.a. Fylkesstrategien for kultur 2022 – 2025 – den overordna strategien som ligg på fylkeskommunen si nettside. Elles er det mogeleg å søke tilskott til ymse formål, og det ligg informasjon på: Frivillighetens år 2022 (frivillighetensar.no). Seks rickshaw-syklar vert frakta rundt i Noreg til bruk for gjennomføringa av Sykkelturen 2022 som skal gå frå Nordkapp til Arendal. I vårt område skal sykkelturen ha slike etappar: Frå foten av Trollstigen og opp på platået, Hoelsfossen til Sylte og frå Øvrebust til sentrum i Stordal, og den skal gjennomførast torsdag 16. juni.

Til slutt hadde dei frammøtte idedugnad om kva arrangement ein kan få til der sykkelturen går.